Гўдакларни тўғри озиқлантириш

Чақалоқ ва гўдакларни овқатлантиришда зарур бўлган фойдали маълумотлар

Бола туғилгач, уни кўкрак сути билан озиқлантириш зарур. Чунки она сутида гўдак учун зарур озиқлар, юздан ортиқ микроэлементлар бор. Боланинг сувга бўлган эҳтиёжи ҳам сут ҳисобига қопланади. Сунъий озиқлантириладиган болалар эмизиладиган гўдакларга қараганда турли касалликларга чалиниш хавфига кўпроқ дучор бўлиши аниқланган. Болани кўкрак сути билан озиқлантирадиган оналарда саратон касаллиги келиб чиқиши хавфи камаяди.

Гўдакни табиий усулда парваришлаш, биринчи навбатда, она сути билан озиқлантиришдан бошланади. Она сути таркибидаги таурин, натрофил моддалари бола миясининг яхши ривожланиши учун жуда зарур.

Бу жиҳатлар эътиборга олиниб, БМТнинг Болалар жамғармаси – ЮНИСEФ гўдакларни она сути билан боқиш ҳақида бутун дунйода кенг тарғибот ишлари олиб бормоқда. Жаҳон соғлиқни сақлаш ташкилоти томонидан "Бехатар оналик" дастури амалга оширилаётир. Унда кўзда тутилган ҳомиладорлик табиий жараён экани эътиборга олиниб, бу даврни иложи борича дори-дармонсиз ўтказиш, ҳомиладор аёлни моддий, маънавий, руҳий жиҳатдан қўллаб-қувватлаш, чақалоқ дунёга келган лаҳзаданоқ она бағрида парваришлашга оид тавсиялар берилган.